Կուրիլյան կղզիներում գտնվող Չիկուրաչկի հրաբուխը 3 կմ բարձրության վրա մոխրի սյուն է նետել

Հրաբխագետները երեքշաբթի արձանագրել են Չիկուրաչկի հրաբխի վրա, որը գտնվում է Պարամուշիր կղզում (Կուրիլյան կղզիների հյուսիսային խումբ, Սախալինի մարզ), մոխրի արտանետում՝ մինչև 3 կմ բարձրության վրա: Այս մասին գրում է ՏԱՍՍ-ը։

«Հրաբխային ամպի բարձրությունը հասնում էր 3000 մետրի»,- ասվում է զեկույցում։

Ըստ հրաբխագետների՝ մոխիրը տարածվել է հրաբխից 104 կմ դեպի արևմուտք-հարավ-արևմուտք: Հրաբուխը ցույց է տալիս ակտիվության բարձրացում՝ ժայթքման մեծ հավանականությամբ։ 

Չիկուրաչկին ակտիվ հրաբուխ է Մեծ Կուրիլյան լեռնաշղթայի Պարամուշիր կղզում, որը գտնվում է Սեվերո-Կուրիլսկ քաղաքից 60 կմ հարավ: Նրա բարձրությունը 1816 մ է, այն կղզու ամենաբարձր կետն է։ Վերջին անգամ այս հրաբխի արտանետումները գրանցվել են 2016 թվականի ամռանը, այնուհետև վերսկսվել միայն 2022 թվականի հունվարի 31-ին: