ՄԱԿ-ի գլխավոր քարտուղարը հայտարարել է «Ազովստալից» 500 մարդու տարհանման մասին

ՄԱԿ-ի գլխավոր քարտուղար Անտոնիու Գուտերեշը հայտարարել է ռուսական զորքերի կողմից արգելափակված Մարիուպոլի «Ազովստալ» գործարանի տարածքից մոտ 500 մարդու տարհանման մասին, հայտնում է РБК-ն։

«ՄԱԿ-ի և Կարմիր խաչի միջազգային կոմիտեի համատեղ գործողության ընթացքում երկու շարասյուներով Մարիուպոլի «Ազովստալ» գործարանից և հարակից տարածքներից տարհանվել է մոտ 500 մարդ»,- ասել է Գուտերեշը:

ՄԱԿ-ի գլխավոր քարտուղարը հույս է հայտնել, որ Մոսկվայի և Կիևի միջև համակարգման գործընթացը կշարունակվի, և կավելանա խաղաղ բնակիչների տարհանման համար «մարդասիրական դադարների» թիվը։

Ուկրաինայի նախագահն էլ հայտարարել է,  որ «Ազովստալի» ուղղությամբ կրակը չի դադարում, և նշել, որ «Ազովստալից» տարհանվել է ավելի քան 150 մարդ, 300-ից ավելի մարդ դուրս է բերվել Մարիուպոլից և հարակից տարածքներից։

Ռուսաստանի նախագահի խոսնակ Դմիտրի Պեսկովը, արձագանքելով գործարանը գրոհելու մասին ուկրաինական կողմի հայտարարություններին, ընդգծել է, որ երկրի զինված ուժերը ոչ թե գրոհում են «Ազովստալը», այլ ճնշում զինյալների առաջխաղացման փորձերը։