Բրիտանական նոր պատժամիջոցները կարող են ազդել ռուսական էներգետիկ ընկերությունների ակտիվների վրա

Մեծ Բրիտանիայի կառավարությունը երկուշաբթի օրը կներկայացնի Ռուսաստանի դեմ պատժամիջոցների նոր փաթեթ, որը կարող է ազդել ռուսական էներգետիկ ընկերությունների ակտիվների վրա։ ТАСС-ի հաղորդմամբ՝ այս մասին հայտնում է  The Times թերթը՝ վկայակոչելով բրիտանական նախարարների կաբինետի աղբյուրները։

Սահմանափակումները, որոնք ենթադրում են ակտիվների սառեցում և Միացյալ Թագավորություն մուտքի արգելք, կտարածվեն Ռուսաստանի իշխանությունների համար ռազմավարական նշանակություն ունեցող ֆիզիկական և իրավաբանական անձանց վրա։

Կիրակի օրը Մեծ Բրիտանիայի արտաքին գործերի նախարար Լիզ Թրասը Sky News-ին տված հարցազրույցում ասել է, որ երկրի իշխանությունները կփոփոխեն գործող օրենսդրությունը, որպեսզի կարողանան ընդլայնել պատժամիջոցների ցանկը։ «Ներկայումս մենք կարող ենք պատժամիջոցներ կիրառել միայն նրանց դեմ, ովքեր անմիջականորեն մասնակցում են Ուկրաինայում ապակայունացմանը: Մենք պատրաստվում ենք ընդլայնել ցուցակը, որպեսզի Կրեմլին և Ռուսաստանի ռեժիմին հետաքրքրող ցանկացած ընկերություն ենթարկվի պատժամիջոցների», - ասել է նա:

Միևնույն ժամանակ, Թրասը հրաժարվեց որևէ մանրամասներ հայտնել, թե ինչ են լինելու հայտարարված սահմանափակումները։ «Ոչինչ բացառված չէ»,- ասել է Մեծ Բրիտանիայի ԱԳՆ ղեկավարը՝ պատասխանելով Լոնդոնում բնակվող ռուս խոշոր գործարարների ունեցվածքի դեմ հնարավոր միջոցների մասին հարցին։