Փլվել է Գյումրիի «Զանգակ» մանկապարտեզի պատերը
Երեկ Գյումրիում տեղացած առատ տեղումները բացի փողոցներում և մասնավոր կառույցներում խնդիրներ ստեղծելուց, վնասներ է հասցրել նաև Գյումրու մանկապարտեզներից մեկին։
Անձրևաջրերը ողողել են Գյումրու ամենախոցելի թաղամասերից մեկը համարվող «Ավտոկայան» տնակային ավանում գտնվող «Զանգակ» մանկապարտեզի տարածքը։
Ըստ Գյումրու համայնքապետարանի աշխատակազմի կրթության բաժնի պետի ժ/պ Շողիկ Աելքսանյանի նախակրթարանը երկրաշարժից հետո գործում էր տնակային պայմաններում, երեսուն և ավելի տարիների ընթացքում քիչ է որ այն արդեն խարխլվել էր, երեկվա անձրևաջրերն էլ ավելի քայքայեցին տնակը։ Ջուրը ողողել է ամբողջ տարածքը, փլվել են նաև պատերը, գույքն այլևս օգտագործման համար պիտանի չէ։ Վերանորոգում իրականացնել հնարավոր չէ։
Շողիկ Ալեքսանյանի հավաստմամբ նախակրթարանը ներառված է Հայաստանի տարածքային զարգացման հիմնադրամի կողմից իրականացվող ծրագրում, որով պետք է կառուցվեր նոր շենք, երեկվա դեպքը կարծես արագացրեց այս գործընթացի կյանքի կոչելը։ Առավոտյան քաղաքապետի մոտ կայացած խոհրդակցության ժամանակ որոշում կայացվեց գրություն-խնդրանք ներկայացնել հիմնադրամի ղեկավար Արթուր Սողոմոնյանին, որպեսզի գործընթացը արագացնեն։
Նախագիծը պատրաստ է, պետք է շինարարի մրցույթ հայտարարվի, որը մեկ երկու ամիս կտևի, նախ պետք է ապամոնտաժվեն տնակները, հետո սկսվի շինարարական աշխատանքները։ Ամենայն հավանականությամբ աշնանը։
Ի դեպ, նշենք որ համավարակով պայմանավորված Գյումրու մանկապարտեզները ժամանակավորապես դադարեցրել են իրենց աշխատանքները։
Կարծիքներ