Մալաթիա-Սեբաստիայի ղեկավարի գլխավորությամբ շուտով ջոկատ կմեկնի Արցախ

Օրերս վարչապետ Նիկոլ Փաշինյանը ֆեյսբուքյան ուղիղ եթերում խոսելով պատերազմական իրավիճակի մասին, կոչով դիմել էր ժողովրդին, նշելով, որ հարկավոր է զենք վերցնել և գնալ ռազմաճակատ: Վարչապետը  շեշտել էր, որ կամավորագրման պրոցեսը պետք է ղեկավարեն քաղաքապետերը, գյուղապետերը, պետական և ինքնակառավարման մարմինները: Վարչապետի այս կոչից հետո բազմաթիվ համայնքապետեր,  մարզպետեր հայտարարեցին, որ ղեկավարում են կամավորական ջոկատները և պատրաստ սպասում ՊՆ-ի հրահանգներին:

Freenews.am-ի հետ զրույցում Մալաթիա-Սեբաստիա վարչական շրջանի ղեկավար Դավիթ Կարապետյանը նշեց, որ անսալով վարչապետի կոչին` կամավորագրվել է հայրենիքին ծառայելու:

«Թաղապետարանի անձնակազմից բազմաթիվ մարդիկ կոչի հենց առաջին իսկ օրվանից  միացել  են Երևանի քաղաքապետի գլխավորած կամավորական ստորաբաժանմանը: Բազմաթիվ քաղաքացիներ նույնպես կամավորագրվել են, մենք արդեն կազմել ենք ցուցակը, ուղարկել քաղաքապետարան և սպասում ենք հրահանգներին»,-նշեց Կարապետյանը՝ խուսափելով այլ մանրամասներ հայտնելուց: