Ձևավորում ենք ժողովրդավարական չափանիշներին համապատասխան ոստիկանություն. Նիկոլ Փաշինյան

Կառավարություն ներկայացված նախագծով ՀՀ ոստիկանության հատկացումներին կավելացվի 2 միլիարդ 35 միլիոն դրամ:

Շուրջ  289 միլիոն դրամ կուղղվի Լոռու և Շիրակի մարզերում նոր ձևավորվող պարեկային ծառայության 140 պարեկային ավտոմոբիլների ձեռքբերմանը, շուրջ 67 միլիոն դրամ կհատկացվի այդ ավտոմոբիլների կահավորմանը:

«1 միլիարդ 670 միլիոն 100 հազար դրամ կհատկացվի վարչական սարքավորումների ձեռքբերման նպատակով»,- ասաց ՀՀ ոստիկանության պետ Վահե Ղազարյանը:

ՀՀ վարչապետ Նիկոլ Փաշինյանն էլ հիշեցրեց, որ Շիրակի և Լոռու մարզերում ապրիլից կգործարկվի պարեկային ոստիկանության ծառայությունը:

«Սա մեզ համար շատ կարևոր նշանակություն ունեցող բարեփոխում է: 2021 թվականի հուլիսից մայրաքաղաքում գործում է  պարեկային ոստիկանությունը: Հայաստանի արտաքին դիմագծի բրենդը ժողովրդավարությունն է, և մենք, ըստ էության, ձևավորում ենք ժողովրդավարական չափանիշներին համապատասխան ոստիկանություն: Իհարկե, այս գործընթացն առանց թերությունների ու բարդությունների չի անցնում, բայց այս բարեփոխումն իրեն արդարացնում է»,- ասաց Փաշինյանը: