Գյումրու քաղաքային մարզադաշտում ավարտված են Համահայկական 8-րդ ամառային խաղերի բացման նախապատրաստական աշխատանքները

Գյումրու քաղաքային մարզադաշտում ավարտված են Համահայկական 8-րդ ամառային խաղերի բացման հանդիսավոր արարողության նախապատրաստական վերջին աշխատանքները:

Այս մասին հայտնում են Շիրակի մարզպետարանից։

Բացման արարողության ու շքերթի համար կառուցվել է մեծ բեմահարթակ, տեղադրվել է լուսաձայնային ժամանակակից տեխնիկա։

Աշխատանքային եռուզեռի վերջին ակորդներին եչեկ՝ օգոստոսի 4-ի երեկոյան հետևել են Համահայկական ամառային ութերորդ խաղերի կազմակերպման և անցկացման կազմկոմիտեի նախագահ Արայիկ Հարությունյանը, Շիրակի մարզպետ Մուշեղ Մուրադյանն ու ՀԽՀԿ նախագահ Իշխան Զաքարյանը։

8-րդ ամառային խաղերին կմասնակցեն ավելի քան 7000 մարզիկ-մարզուհիներ՝ աշխարհի 41 երկրների 179 քաղաքներից: Սպորտային միջոցառման նախապատրաստական աշխատանքներում ներգրավված է ավելի քան 2000 կամավոր՝ հիմնականում հայաստանյան բուհերի ուսանողներից:

Աշխատանքային բարձր պատրաստվածության են բերվել բոլոր ծառայությունները` ոստիկանություն, փրկարար ծառայություն, շտապօգնություն։
Առաջին օգնության սպասարկում կիրականացնի Հայկական Կարմիր խաչի ընկերությունը։