Միջազգային տիեզերակայանում հրամանատարի գործառույթներն առաջին անգամ կկատարի եվրոպացի կին տիեզերագնացը

Տիեզերագնաց Սամանտա Կրիստոֆորետտին կդառնա պատմության մեջ առաջին եվրոպացի կին հրամանատարը Միջազգային տիեզերակայանում: «ՌԻԱ Նովոստի»-ի փոխանցմամբ՝ ասվում է Եվրոպական տիեզերականգործակալության մամուլի հաղորդագրության մեջ: 

Հաղորդվում է, որ Կրիստոֆորետտին կգլխավորի 68-րդ արշավախումբը Միջազգային տիեզերակայանում և տիեզերագնացներին կմիանա 2022 թվականին ՆԱՍԱ-ի տիեզերագնացներ Չել Լինդգրենի և Բոբ Հայնսի հետ: Նրանք ՄՏԿ կթռչեն SpaceX ընկերության Crew Dragon տիեզերանավով:

«Վերադառնալ ՄՏԿ՝ Եվրոպան ներկայացնելու համար, պատիվ է ինձ համար: Ես հպարտությամբ եմ ընդունում իմ նշանակումը ՄՏԿ-ի հրամանատարի պաշտոնում և անհամբերությամբ սպասում եմ տիեզերքում և Երկրում կուտակված փորձի կիրառման տաղանդավոր թիմի հետ ուղեծրում»,- ասել է իտալուհին:

Նշվում է, որ Կրիստոֆորետտին դարձել է 5-րդ եվրոպացի հրամանատարը Միջազգային տիեզերակայանում:

Նախկինում հրամանատար կանայք արդեն եղել են ՄՏԿ-ում: Տիեզերագնացների անձնակազմը տարբեր ժամանակներ գլխավորել են ամերիկուհիներ Սունիտա Ուիլյամսը, Շենոն Ուոլքերը և Փեգի Ուիթսոնը: