Ճապոնիան ևս միանում է Պեկինի-2022-ի դիվանագիտական բոյկոտին

Ճապոնիայի կառավարության գլխավոր քարտուղար Հիրոկազու Մացունոն հաստատել է 2022 թվականի Պեկինի Օլիմպիական խաղերի դիվանագիտական ​​բոյկոտը։ Այս մասին նա հայտարարել է Տոկիոյում կայացած մամուլի ասուլիսում, փոխանցում է ՏԱՍՍ-ը։

Գլխավոր քարտուղարը հայտնել է, որ Ճապոնիան չի նախատեսում կառավարական պատվիրակություն ուղարկել Չինաստանի մայրաքաղաք։ Նրա խոսքերով` երկիրը կներկայացնեն սպորտի պատասխանատուները։

«Օլիմպիական խաղերին կմասնակցեն Տոկիոյի խաղերի կազմկոմիտեի նախագահ Հաշիմոտոն և Ճապոնիայի օլիմպիական կոմիտեի ղեկավար Յամաշիտան, նաև   պարալիմպիկ կոմիտեի ղեկավարը կգա Պեկինի պարալիմպիկ խաղերին»,- ասել է Մացունոն:

Հիշեցնենք, որ դեկտեմբերի 6-ին հայտնի դարձավ Օլիմպիական խաղերին պաշտոնյաների ուղարկելուց ԱՄՆ-ի հրաժարվելու մասին։ Բոյկոտի պատճառը Չինաստանում մարդու իրավունքների խախտումն է։ Դեկտեմբերի 8-ին Ավստրալիան և Կանադան միացան խաղերի դիվանագիտական ​​բոյկոտին։ Նույն օրը Մեծ Բրիտանիայի վարչապետ Բորիս Ջոնսոնը հայտարարեց, որ իր երկրի կառավարությունը չի աջակցում խաղերի բոյկոտին, սակայն բրիտանացի պաշտոնյաները չեն մասնակցի ՕԽ-ի բացմանը։

Օլիմպիական խաղերը կանցկացվեն 2022 թվականի փետրվարի 4-ից 20-ը Չինաստանի մայրաքաղաքում։