Տիգրան Ավինյանը՝ ավագանու արտահերթ ընտրություններ անցկացնելու խոսակցությունների մասին
Երևանի քաղաքապետի թեկնածու Տիգրան Ավինյանն ավագանու նիստի իր ելույթում անդրադարձել է ավագանու արտահերթ ընտրություններ անցկացնելու մասին խոսակցություններին։
«Վերջին շրջանում շատ խոսվեց ավագանու արտահերթ ընտրություններ անցկացնելու վերաբերյալ: Կարծում եմ, մեր քաղաքացիներն անցնող 5 տարվա ընթացքում համոզվել են, որ մեր քաղաքական թիմը երբեք չի խուսափել արտահերթ ընտրություններից, և ընդունել է այն արդյունքները, որոնք ձևավորվել են քաղաքացիների ազատ կամարտահայտման արդյունքում: Երկրում ստեղծված իրավիճակը, հազարավոր մեր հայրենակիցների ԼՂ-ից բռնի տեղահանվելը, բոլորիս պետք է համախմբի ամեն կերպ նրանց աջակցելու, նրանց կարիքները հոգալու և սատարելու գործում: Իսկ նոր ընտրությունները ոչնչով չէին նպաստելու դրան, ավելին, շիկացնելու էին առանց այն էլ առկա լարված մթնոլորտը: Այժմ կարծում եմ ոչ թե քարերը նետելու, այլ հավաքելու ժամանակն է»,– ասել է նա:
Նա շնորհակալություն է հայտնել ընտրական տեղամասեր այցելած բոլոր ընտրողներին՝ անկախ նրանց կատարած ընտրությունից:
«Ձեր քվեի պաշտպանությունը եղել է, կա և կմնա մեր հիմնական պարտականությունը: Երևանին և երևանցիներին ծառայելը մեր նպատակն է, որակյալ ծառայելություններ մատուցելը՝ մեր ամենօրյա խնդիրը, հետևաբար՝ բոլորիդ աջակցությունն եմ հայցում՝ Երևանն երևանցիների համար հարմարավետ ու հասանելի դարձնելու գործում»,– ասել է Տիգրան Ավինյանը:
Կարծիքներ