«Կորոնավիրուսով հիվանդների հետ աշխատած բժիշկների կենսաթոշակային ստաժը կրկնակի է հաշվվելու»․ Միշուստին

Ռուսաստանի Դաշնության վարչապետ Միխայիլ Միշուստինը հայտարարել է, որ կորոնավիրուսով հիվանդների հետ աշխատած բժիշկների կենսաթոշակային ստաժը կրկնակի է հաշվվելու, հայտնում է eadaily.com կայքը։

Աղբյուրը մանրամասնում է, որ կորոնավիրուսի տարածման դեմ պայքարը համակարգող խորհրդի նիստի ժամանակ Միշուստինը նշել է, որ Ռուսաստանում կորոնավիրուսային իրավիճակն աստիճանաբար բարելավվում է:

«Չնայած, որ երկրում իրավիճակն աստիճանաբար շարունակում է բարելավվել, մենք անընդհատ իրականացնում ենք մշտադիտարկում, որը թույլ է տալիս օպերատիվ հայտնաբերել հիվանդներին և նրանց օգնություն ցուցաբերել», հայտնել է կառավարության ղեկավարը։

Վերջին տեղեկությունների համաձայն՝ Ռուսաստանի 83 շրջանում նախօրեին գրանցվել է կորոնավիրուսով վարակման 5 118 նոր դեպք։ Վարակակիրների ընդհանուր թիվը երկրում հասել է 892 654-ի։ Նշվում է, որ վարակման դեպքերի հայտնաբերման օրական ցուցանիշը չի գերազանցում 0,6 տոկոսը։