ՔԿ-ի պարզաբանումը՝ Դավիթ Տոնոյանի առնչությամբ քրգործի վերաբերյալ

ՀՀ պաշտպանության նախարար Դավիթ Տոնոյանի վերաբերյալ ՀՀ քննչական կոմիտեում հարուցված քրեական գործ չկա։ Այս մասին պարզաբանում է տարածել ՀՀ քննչական կոմիտեն։

Պարզաբանման մեջ, մասնավորապես, ասվում է.

«Պարզաբանում. ՀՀ պաշտպանության նախարար Դավիթ Տոնոյանի վերաբերյալ ՀՀ քննչական կոմիտեում հարուցված քրեական գործ չկա

Ի պատասխան զանգվածային լրատվության միջոցներում Ցոլակ Խաչատրյանի գործի վերաբերյալ շրջանառվող տեղեկատվությանը, հաշվի առնելով նշված գործի վերաբերյալ անհարկի շահարկումները՝ տեղեկացնում ենք, որ ՀՀ պաշտպանության նախարար Դավիթ Տոնոյանի վերաբերյալ ՀՀ քննչական կոմիտեում հարուցված քրեական գործ չկա:

Ինչ վերաբերում է ՀՀ քաղաքացի Ցոլակ Խաչատրյանի հաղորդման հիման վրա հարուցված քրեական գործի վերաբերյալ մամուլում տեղ գտած հրապարակումներին, ապա տեղեկացնում ենք, որ ՀՀ քննչական կոմիտեի զինվորական քննչական գլխավոր վարչության չորրորդ կայազորային քննչական բաժնում 15.06.2020թ. հարուցվել է քրեական գործ՝ ՀՀ քրեական օրենսգրքի 353-րդ հոդվածի (դատական ակտը դիտավորությամբ չկատարելը) 1-ին մասով, Ցոլակ Խաչատրյանը ճանաչվել է տուժող եւ ցուցմունք տվել:

Քրեական գործի նախաքննությունը շարունակվում է:

Կոչ ենք անում զանգվածային լրատվության միջոցներին՝ զերծ մնալ ապատեղեկատվություն տարածելուց, ինչպես նաեւ՝ ընթերցողին մոլորեցնելու նպատակ հետապնդող հրապարակումներից»։

Հիշեցնենք, որ ավելի վաղ ՀՀ քննչական կոմիտեից տեղեկացրել էին, որ պահեստազորի սպա Ցոլակ Խաչատրյանի կողմից ՀՀ պաշտպանության նախարար Դավիթ Տոնոյանի եւ այլ պաշտոնատար անձանց դեմ ներկայացված հաղորդման հիման վրա հարուցվել է քրեական գործ: