Կիևի կենտրոնում բերման են ենթարկվել մարտական նռնակներով զինված 2 տղամարդ
Ազգային գվարդիայի և ազգային ոստիկանության աշխատակիցները Կիևի կենտրոնում` «Անկախության հրապարակ» մետրոյի մոտակայքում բերման են ենթարկել հարբած տղամարդկանց, որոնցից մեկի մոտ հայտնաբերվել են Ф1 և РГД-5 մարտական նռնակներ: Այս մասին տեղեկացնում է «ՌԻԱ Նովոստի» գործակալությունը` հղում տալով Ազգային Գվարդիայի մամուլի ծառայությանը:
«Գվարդիականները ազգային ոստիկանության աշխատակցի հետ, որոնք հերթապահում էին Կիևի մետրոյի «Անկախության հրապարակ» կայարանի մոտ, նկատել են կասկածելի տղամարդկանց, որոնք ունեցել են հարբածության նշաններ, և կանգնեցրել են նրանց մակերեսային ստուգման համար: Նրանցից մեկի պայուսակում նռնակների նման երկու առարկաներ են հայտնաբերվել», - ասվում է հաղորդագրության մեջ:
Գվարդիականները դեպքի վայր են հրավիրել ոստիկաններին և տեխնիկներին: Այժմ ոստիկանությունը ստուգում է տեղեկատվությունը և պարզում զինամթերքի ծագումը:
Կարծիքներ