Գարիկ Սարգսյանը ստանձնել է Վեդի համայնքի ղեկավարի պաշտոնը
Հանդիսավոր արարողությամբ այսօր Գարիկ Սարգսյանը ստանձնել է Վեդի համայնքի ղեկավարի պաշտոնը:
Այս մասին տեղեկացնում է Արարատի մարզպետարանը:
Միջոցառմանը ներկա են եղել Արարատի մարզպետ Սեդրակ Թևոնյանը, ՀՀ կառավարության անդամներ, ԱԺ պատգամավորներ և պատվավոր այլ հյուրեր:
Ստանձնելով համայնքի ղեկավարի լիազորությունները՝ Գարիկ Սարգսյանը երդվել է պահպանել ՀՀ Սահմանադրությունը, օրենքները, համայնքի ավագանու որոշումները, ազնվորեն և բարեխղճորեն կատարել համայնքի ղեկավարի լիազորությունները, ծառայել համայնքի բարգավաճմանը, գործել ի բարօրություն ժողովրդի, ուժերի անմնացորդ նվիրումով սատարել ժողովրդի հավատին, նպաստել նրա նյութական և հոգևոր վերելքին։
Ելույթի իր խոսքում, շնորհավորելով Գարիկ Սարգսյանին ընտրություններում տարած հաղթանակի և Վեդի համայնքի ղեկավարի պաշտոնը ստանձնելու կապակցությամբ, Արարատի մարզպետն ասել է.
«Դուք մեծ պատասխանատվություն եք վերցրել Ձեր ուսերին, բայց ուզում եմ, որ վստահ լինեք՝ Դուք թիմ ունեք, ովքեր պետությանը, սեփական ժողովրդին սիրել և հարգել գիտեն։ Վեդի խոշորացված համայնքն ի դեմս Ձեզ՝ զարգանալու է։ Ես վստահ եմ, որ 5 տարի անց էլ վեդեցիները, տեսնելով Ձեր կատարած մեծածավալ աշխատանքը, իրենց ձայնը կրկին վստահելու են Ձեզ»։
Հիշեցնենք, որ Արարատի մարզի Վեդի խոշորացված համայնքում մարտի 28-ին տեղական ինքնակառավարման մարմինների արտահերթ ընտրություններ են կայացել: Ընտրապայքարին մասնակցել է երկու ուժ՝ «Քաղաքացիական պայմանագիր» և «Իմ հզոր համայնք» կուսակցությունները: Հաղթանակ է տարել «Քաղաքացիական պայմանագիր» կուսակցության ընտրական ցուցակը գլխավորող Գարիկ Սարգսյանը:
Կարծիքներ