Հայաստան է ներկրվել 5400 տոննա պարարտանյութ. այն արդեն մատակարարել են մարզերին

Ապրիլի 9-ի դրությամբ ՀՀ է ներկրվել 5400 տոննա պարարտանյութ։ Տեղեկությունը ֆեյսբուքյան էջում հայտնում է ՀՀ էկոնոմիկայի նախարարությունը։

Նշվում է, որ պարարտանյութը մատակարարվել է ՀՀ մարզերին։

Նախարարությունը, միաժամանակ, հերքում է մամուլում տարածվող լուրերը, համաձայն որոնց` 2022 թվականի մարտի 3-ին կառավարության կողմից հաստատված պարարտանյութի սուբսիդավորման ծրագիրը չի իրականացվելու։

«Պարարտանյութերի ներկրումը ՀՀ և մատակարարումը մարզեր ընթացքի մեջ է․ ծրագիրը կիրականացվի ՀՀ բոլոր մարզերում: Մատակարարների կողմից պարարտանյութերի վաճառքը կտևի մինչև հունիսի 15-ը»,–ասվում է հաղորդագրության մեջ։

Հիշեցնենք, որ ըստ ծրագրի` պարարտանյութ կտրամադրվի առավելագույնը 3 հեկտար հողատարածքում մշակություն իրականացնելու համար։ Եվ կսուբսիդավորվի կամ կփոխհատուցվի մատակարարների կողմից շահառուներին վաճառվող պարարտանյութի վաճառքի գնի 50%-ը, բայց ոչ ավելի քան 50 կգ քաշով 1 պարկ պարարտանյութի հաշվով 9000 դրամը։