Բարբադոսը դարձավ հանրապետություն

Կարիբյան ծովի Բարբադոս կղզի նահանգը երեքշաբթի օրը պաշտոնապես դարձավ հանրապետություն։ Երկրի նախագահ Սանդրա Մեյսոնը, ով ընտրվել է հոկտեմբերին, ստանձնել է պաշտոնը, Մեծ Բրիտանիայի թագուհի Եղիսաբեթ II-ն այլևս չի լինի Կարիբյան պետության ղեկավարը։ ՏԱՍՍ-ի հաղորդմամբ՝ արարողությունը հեռարձակվել է Բարբադոսի կառավարության կայքում ։

Արարողության հյուրն էր բրիտանական գահի ժառանգորդ, Ուելսի արքայազն Չարլզը։ 

«Երդվում եմ հավատարիմ լինել Բարբադոսին, օրենքին համապատասխան։ Ես ազնվորեն ծառայելու եմ Բարբադոսին որպես նախագահ: Աստված օգնական ինձ», - ասել է Մեյսոնը իր երդմնակալության ելույթի ժամանակ։

Պետության ղեկավարի պաշտոնական երդմնակալությունից հետո Բրիջթաունի կենտրոնում անցկացվել է ռազմական շքերթ, որը հեռարձակվել է տեղական բոլոր հեռուստաալիքներով, ինչպես նաև քաղաքի տարբեր հատվածներում տեղադրված էկրաններով։ Իշխանությունները երկրի քաղաքացիներին կոչ են արել հանրապետության հռչակման և անկախության հռչակման 55-ամյակի տոնակատարությունների ժամանակ պահպանել սոցիալական հեռավորություն՝ կորոնավիրուսային վարակի տարածումը կանխելու համար։

Սեպտեմբերի վերջին Բարբադոսի ասամբլեայի պալատը (խորհրդարանի ստորին պալատը) միաձայն պաշտպանել է սահմանադրության փոփոխությունները, որոնց համաձայն Մեծ Բրիտանիայի թագուհի Եղիսաբեթ II-ն այլևս չի լինի Կարիբյան ավազանի երկրի ղեկավարը։ Հոկտեմբերին խորհրդարանականները երկրի նախագահի պաշտոնում ընտրեցին 72-ամյա Սանդրա Մեյսոնին, ով 2018 թվականից զբաղեցնում էր կղզու գլխավոր նահանգապետի պաշտոնը։

Բարբադոսը անկախ պետություն է Համագործակցության կազմում՝ Մեծ Բրիտանիայի գլխավորությամբ։ Կղզին կմնա միության կազմում նույնիսկ հանրապետության հռչակումից հետո։ Բարբադոսը գտնվում է Կարիբյան ավազանի արևելյան մասում և այնտեղ ապրում է ավելի քան 287,000 մարդ: Երկիրը անկախություն է ձեռք բերել 1966 թվականի նոյեմբերի 30-ին։