Ճապոնիան 113 հազար ԱՄՆ դոլար կտրամադրի «Շիրակ» ջրօգտագործողների ընկերությանը՝ Վարդաքարի ջրամբարի բարեկարգման համար
ՀՀ տարածքային կառավարման և ենթակառուցվածքների նախարարի տեղակալ Վաչե Տերտերյանը դեկտեմբերի 14-ին ընդունել է ՀՀ-ում Ճապոնիայի արտակարգ և լիազոր դեսպան պարոն Մասանորի Ֆուկուշիմային։ Հանդիպմանը մասնակցել է նաև «Շիրակ» ջրօգտագործողների ընկերության գործադիր տնօրեն Խաչատուր Խաչատրյանը։
Այս մասին տեղեկացնում է նախարարությունը։
Նախարարի տեղակալը ողջունել է հյուրերին՝ կարևորելով հայ-ճապոնական բեղմնավոր համագործակցությունը և այդ շրջանակներում իրականացվող ծրագրերի կենսական նշանակությունը։ Վաչե Տերտերյանը բարձր է գնահատել Ճապոնիայի կառավարության Մարդկային անվտանգության «Grassroots» ծրագրի շրջանակում իրականացվող «Շիրակի մարզում Վարդաքարի ջրամբարի բարեկարգման ծրագիրը»։
ՀՀ-ում Ճապոնիայի արտակարգ և լիազոր դեսպան պարոն Մասանորի Ֆուկուշիման նշել է, որ ծրագրի իրականացումը կնպաստի գյուղացիների կյանքի որակի բարձրացմանը և գյուղատնտեսության արտադրողականության բարձրացմանը։ Ծրագիրը իրականացնելու համար «Շիրակ» ջրօգտագործողների ընկերությանը կտրամադրվի մոտ 113 հազար ԱՄՆ դոլար գումար, որը կուղղվի Վարդաքարի ջրամբարի բարեկարգման և արևային կայանների տեղադրման աշխատանքների իրականացմանը։
Հանդիպմանը ողջույնի խոսքով հանդես եկած Խաչատուր Խաչատրյանը նշել է․ «Հատկանշական է, որ «ծագող արևի երկիր» Ճապոնիան հնարավորություն է ստեղծում օգտվել արևի էներգիայից»։
Հանդիպման ավարտին Խաչատուր Խաչատրյանը և Մասանորի Ֆուկուշիման ստորագրել են «Շիրակի մարզի Վարդաքարի ջրամբարի բարեկարգման դրամաշնորհային» ծրագիրը։
Կարծիքներ