Կորոնավիրուսի պատճառով կարող են խանգարվել տարբեր օրգանների արյան մատակարարումը․ բժիշկ

Կորոնավիրուսի պատճառով կարող են խանգարվել տարբեր օրգանների արյան մատակարարումը․ բժիշկ

Պարետատան նիստից հետո հրավիրած ճեպազրույցում Առողջապահության նախարարության ինֆեկցիոն հիվանդությունների գծով խորհրդատու Նարինա Սարգսյանցը ներկայացրեց, թե ինչ ընթացք է ունենում կորոնավիրուսային վարակը։

«Վիրուսը ներթափանցում է հիմնականում շնչուղիներով։ Եվ հենց շնչուղիներն են, որոնք հանդիսանում են վիրուսի համար հիմնական թիրախ։ Վիրուսը կպչում է հատուկ ընկալիչներին, որոնք առկա են մեր շնչուղիների մակերեսին, և որոշ դեպքերում նաև կարող են ախտահարվել ստորին շնչուղիները, այսինքն՝ կարող է զարգանալ թոքաբորբ։ Այն անձանց մոտ, որոնց մոտ հիվանդությունը դրսևորվում է, ախատանիշներ են ունենում, 40 տոկոս դեպքերում վարակն ընթանում է թեթև, 40 տոկոս դեպքերում՝ թոքաբորբով։ Այս պահին մեզ հայտնի գիտելիքներով՝ դա վիրուսային թոքաբորբ է, ինչը բարդացնում է այս վարակի բուժումը։ Մնացած 20 տոկոսից 15 տոկոսը ծանր թոքաբորբերն են, 5 տոկոսը՝ ծայրահեղ ծանր ընթացքն է, ինչպիսին է սեպսիսը, սուր շնչառական անբավարարությունը»,- ասաց Սարգսյանցը։

Մասնագետի խոսքով՝ այս վարակն ունի առանձնահատկություն՝ խանգարվում է զանազան օրգանների արյան մատակարարումը, զարգանում են թրոմբներ։ «Դա բերում է մի շարք օրգանների, ոչ միայն թոքերի, կարող են լինել երիկամները, սիրտը, կենտրոնական նյարդային համակարգը, խանգարվում է դրանց արյան մատակարարումը, այսինքն՝ զարգանում են ինսուլտներ։ Ծանր թոքաբորբը, որը 15 տոկոս դեպքերում է զարգանում, բնորոշվում է նրանով, որ տեղի է ունենում թթվածնային քաղց։ Եվ այդ հիվանդներին ուղղակի խիստ անհրաժեշտ է թթվածին։ Ուղերձս հետևյակն է՝ խստագույնս հետևել կանոններին, վստահել ձեր բժիշկներին։ Մի զբաղվեք ինքնաբուժությամբ, լսեք ձեր բժիշկներին։ Մենք պետք է գիտակցենք բոլորս, որ սա վարակային հիվանդություն է, սա հանրային առողջության հարց է։ Եթե որևէ առանձին անձ մտահոգված չէ իր սեփական առողջությամբ, պետք է մտահոգված լինի հանրային առողջության հարցերով»,- ասաց բժիշկը։