Առաջիկա տարիներին հիմնական շեշտը դնելու ենք արդյունաբերության զարգացման վրա. Վահան Քերոբյան

ՀՀ էկոնոմիկայի նախարար Վահան Քերոբյանը հունիսի 9-ին մասնակցել է CLUBFIRST SUMMIT ARMENIA միջոցառմանը, որին ներկա  են եղել Հայաստանի և Ռուսաստանի գործարար շրջանակների շուրջ հարյուր ներկայացուցիչներ։

Այս մասին ֆեյսբուքյան իր էջում տեղեկացրել է նախարարը:

Գրառման մեջ ասված է.

«Մեր հյուրերին ներկայացրեցի Հայաստանի տնտեսության այսօրվա պատկերը, Կառավարության տնտեսական քաղաքականությունը, իրականացվող և նախատեսվող ծրագրերը։ Ասացի, որ առաջիկա տարիներին հիմնական շեշտը դնելու ենք արդյունաբերության զարգացման վրա, մասնավորապես քիմիայի և մետալուրգիայի, մեքենաշինության, տեքստիլ արդյունաբերության, ոսկերչության, դեղագործության վրա։ Խոսեցի նաև գյուղատնտեսության ոլորտի օժանդակության ծրագրերի մասին։

Հավաստիացրեցի, որ Հայաստանի կառավարությունը կձեռնարկի բոլոր հնարավոր միջոցները՝ գործարար համայնքի գործունեությունն առավել արդյունավետ դարձնելու և անհրաժեշտ աջակցություն ցուցաբերելու համար»: