Կիմ Չեն Ընը հայտարարել է, որ Հյուսիսային Կորեան չի դադարեցնի զենքի համակարգերի կատարելագործումը

ԿԺԴՀ-ն չի դադարեցնի ավելի առաջադեմ սպառազինության համակարգերի մշակումը «թշնամական ուժերի» գործողությունների պատճառով, որոնք խաթարում են Կորեական թերակղզու անվտանգությունը։ Այս մասին հայտարարել է հանրապետության ղեկավար Կիմ Չեն Ընը՝ Hwaseong-18 միջմայրցամաքային բալիստիկ հրթիռի հաջող արձակման կապակցությամբ, հինգշաբթի  հաղորդում է Կորեայի կենտրոնական լրատվական գործակալությունը (KCNA)։

Կիմ Չեն Ընն անձամբ է վերահսկել հուլիսի 12-ի արձակումը տեղում: «Լիովին գոհունակություն հայտնելով փորձարկման արձակման արդյունքներից՝ հարգարժան ընկեր Կիմ Չեն Ընը ուրախությամբ ասաց, որ ներկայիս հաջողությունը ցույց տվեց ԿԺԴՀ-ի հզորությունը, որն իր զինանոցում ունի միջուկային պատերազմի հուսալի զսպող միջոց՝ նախատեսված ինքնապաշտպանության համար։ Ներկայիս հաջողությունը ևս մեկ կարևոր իրադարձություն է Հյուսիսային Կորեայի ռազմավարական ուժերի զարգացման գործում»,- ասվում է KCNA-ի զեկույցում: