«Իրական Հայաստան՝ Հայաստանի Հանրապետություն». վարչապետն ասմունքել է իր գրած բանաստեղծությունը

«Ես այն կարծիքին եմ, որ քաղաքական հայեցակարգերը պետք է ստանան գեղագիտական արտահայտություն և ահա Հայաստանի՝ 29743 քկմ-ի, «Հայրենիքը պետությունն է» հայեցակարգի մտորումներում գրեցի հետևյալ բանաստեղծությունը»:

Այս մասին «Ֆեյսբուք»-ի իր էջում հայտնել է ՀՀ վարչապետ Նիկոլ Փաշինյանը՝ նշելով, որ բանաստեղծությունը վերնագրված է «Իրական Հայաստան՝ Հայաստանի Հանրապետություն»:

Վարչապետը ասմունքել է այն.

«Մենք քեզ ուզում ենք տեսնել երջանիկ,

Բայց պիտի տեսնե՛նք քեզ դրա համար:

Մեր հայացքները՝ հեռու քեզանից

Հայրենիքներ են փնտրել անդադար։

Մենք ուզում ենք քեզ տեսնել երջանիկ,

Բայց պիտի տեսնենք՝ Հայաստանն ես իսկ,

Մե՛զ պիտի ուզենք տեսնել երջանիկ,

Քեզանով, քեզնում, անբաժան քեզնից։

Քեզ պարտավոր ենք դարձնել երջանիկ,

Ժպիտը դեմքիդ, լացերդ պարպած,

Հոգեհանգստի տոչորող տանից

Դուրս եկած կյանքի՝ աչքերով մեր թաց։

Եւ քո ապրելը պիտի հավերժի,

Մեր սիրո աղբյուր, մեր հույսի պատվար։

Երջանկությունն է քո տունը վերջին,

Հայրենիք մեր հին, պետություն մեր հար։

Դու այն ամենն ես ինչը որ մենք կանք,

Մեր իղձերը քեզ չեն լքի կրկին,

Չէինք կորցրել քեզ, բայց նորից գտանք,

Պետություն մեր հար, հայրենիք մեր հին»։