Այսօր Հայաստանի ազգային հերոս Թաթուլ Կրպեյանի ծննդյան օրն է
Արագածոտնի մարզի Թաթուլ համայնքում, Թաթուլ Կրպեյանի ծննդյան օրվա առթիվ, այսօր կայացել է Հայաստանի ազգային հերոսի հիշատակին նվիրված միջոցառում:
Արագածոտնի մարզպետ Դավիթ Գևորգյանը, Թաթուլ համայնքի ղեկավար Ալբերտ Հարոյանը, հերոսի ընտանիքի անդամները, մարտական ընկերները և համայնքի բնակիչները գյուղի կենտրոնից ավանդական քայլերթով այցելել են Արցախյան հերոսամարտի զոհերի հիշատակին կառուցված հուշահամալիր, ծաղիկներ խոնարհել Թաթուլ Կրպեյանի և զինակից ընկերների շիրիմներին:
Միջոցառման ընթացքում Թաթուլի միջնակարգ դպրոցի աշակերտները ներկայացրել են Թաթուլ Կրպեյանի հեղինակային ստեղծագործությունները, հանդես եկել ազգային-հայրենասիրական ասմունքով: Ողջունելով ներկաներին՝ մարզպետ Դավիթ Գևորգյանն ասել է.
«Ապրիլի 21-ն ամեն հայի օրացույցում պետք է կարմիրով նշված լինի: Այն ազգը, որը կուրանա, կմոռանա իր ակունքները, իր ազգային արժեքները, չի գնահատի իր հերոսներին, այդ ազգը դատապարտված է կործանման: Մեր ծնողներից, պապերից, նախապապերից մենք այս գեներն ու դաստիարակությունն ենք ստացել և, կարծում եմ, բոլոր հայերն այդ գիտակցումն ունեն:
Արցախյան պատերազմի մեր բոլոր հերոսներն աներկբա գնացել են Թաթուլ Կրպեյանի ու մյուս հերոսների գործը շարունակելու: Մենք, որպես անհատ և որպես ազգ, որպես պետություն, գիտենք և՛ մեր ուժեղ, և՛ թույլ կողմերը. մեր ուժը չի պակասել, սկզբունքներն ու գաղափարը չեն փոխվել: Մեծ հարված ենք ստացել, բայց մենք նույնն ենք մնացել և չենք կարող գլուխներս կախել, ընկճվել ու հիասթափվել:
Ողջ մնացածներս, իմ խորին համոզմամբ, մեր բոլոր հերսների կիսատ թողած գործերն ու նպատակները պետք է իրագործենք, մենք չունենք իրավունք մեր հերոսների նպատակներն ու երազանքներն անկատար թողնելու: Մենք մեր կյանքը պետք է այնպես ապրենք, որ երես ունենանք Թաթուլի և մեր մյուս հերոսների շիրիմներին այցելելու:
Ցանկանում եմ, որ ամեն մեկս ապրենք այնպես, որ մեր հայրենիքը դառնա հզոր. ուրիշ ոչ մի երկիր, որքան էլ ապրելու լավ պայմաններ ունենա, մեր հողից լավը չի կարող լինել: Օտար ափում մենք միշտ հյուր ենք լինելու: Հայրենիքը լուռ են սիրում, գործով են սիրում. ճիշտ գործով, խելացի ձևով շենացնենք մեր հայրենիքը և ամեն ինչ լավ է լինելու: Փա՜ռք Թաթուլին, փա՜ռք մեր հերոսներին, փա՜ռք մեր ժողովրդին»:
Թաթուլ Կրպեյանի քրոջ և եղբայրների հետ մարզպետ Դավիթ Գևորգյանն այցելել է նաև Թաթուլ Կրպեյանի տուն-թանգարան, որտեղ հերոսի հարազատների հետ վերհիշել են Հայաստանի ազգային հերոսի կյանքի փառավոր դրվագներն ու սխրանքները:
Կարծիքներ