Դոնալդ Թրամփն ու Էմանուել Մակրոնը հեռախոսազրույց են ունեցել

Ինչպես տեղեկացնում է ՏԱՍՍ լրատվկան գործակալությունը  ԱՄՆ եւ Ֆրանսիայի նախագահներ Դոնալդ Թրամփն ու Էմանուել Մակրոնը հեռախոսազրույց են ունեցել: Երկու երկրների առաջնորդները մտահոգություն են հայտնել Հունաստանի եւ Թուրքիայի միջեւ լարվածության կապակցությամբ։  Այս մասին պաշտոնական հայտարարություն է տարածել  Սպիտակ տան մամուլի խոսնակ Ջադ Դիրը: Նա հայտարարության մեջ մասնավորապես նշել է․

«Երկու երկրների առաջնորդները մտահոգություն են հայտնել Արեւելյան Միջերկրածովում ՆԱՏՕ-ի դաշնակիցների միջեւ լարվածության կապակցությամբ: Նախագահները համաձայնել են, որ Թուրքիան եւ Հունաստանը պետք է երկխոսություն սկսեն, որը միակ միջոցն է տարաձայնությունները լուծելու համար»,-գրել է նա Twitter-ի իր էջում:       

Երկու պետությունների առաջնորդները  քննարկել են նաեւ Իրանի դեմ զենքի էմբարգոյի երկարաձգման հարցով ՄԱԿ-ի ԱԽ-ի կողմից գործողություններ ձեռնարկելու անհրաժեշտությունը:

Բացի այդ, Թրամփը Մակրոնին հայտնել է, որ ԱՄՆ-ը շարունակում է անհրաժեշտ օգնություն տրամադրել Լիբանանին, որը տուժել է հզոր պայթյունից:

Հունաստանի եւ Թուրքիայի միջեւ հարաբերությունները սրվել են Էգեյան ծովի հունական ափերի մոտ գազ եւ նավթ որոնելու Անկարայի հայտարարած մտադրությունների պատճառով։