Տիգրան Ավինյանն այսօր չի մասնակցում քարոզարշավին. հայտնի է պատճառը

«Քարոզարշավի ընթացքը գնահատում ենք բավականին լավ, կարելի է ասել, որ բոլոր՝ 12 վարչական շրջաններում թեկնածուի գլխավորությամբ եղել ենք»:

Այս մասին այսօր Կենտրոն վարչական շրջանում քարոզարշավի ժամանակ ասաց «Քաղաքացիական պայմանագիր» կուսակցության նախընտրական շտաբի պետ Արմեն Փամբուխչյանը:

«Վարչական շրջաններում մենք իրականացրել ենք ակտիվ քարոզարշավ և կարող ենք ֆիքսել, որ միակ քաղաքական ուժ ենք, որը բոլոր՝ 12 վարչական շրջաններում ամենաօրյա ռեժիմով իրականացրել ենք քարոզարշավ»,- ասաց նա:

Հարցին՝ ինչպե՞ս է գնահատում հաղթանակի հնարավորությունը, Փամբուխչյանը պատասխանեց. «Հաղթանակի հնարավորությունը մեծ ենք գնահատում, այսօր երեկոյան նաև դեբատն է, որին կմասնակցի մեր թեկնածու Տիգրան Ավինյանը»:

Նախընտրական շտաբի պետը նաև տեղեկացրեց, որ Տիգրան Ավինյանը իրենց հետ չէ այս պահին, քանի որ որոշ առողջական խնդիրներ ունի:

«Մի փոքր առողջական խնդիրներ ունի, այսօր մնացել է տանը, որպեսզի ապաքինվի: Այս 20 և ավելի օրերի ընթացքում տարբեր եղանակային պայմաններում քայլելով, շփվելով մի փոքր խնդիրներ կան, բայց վստահ եմ, որ ժամը 22:00-ին իր ամբողջ ներուժով ներկա կլինի դեբատին: Եվ այսպիսով վաղը կավարտենք քարոզարշավը»,- ասաց նա և տեղեկացրեց, որ վաղը՝ 17:30-ին, Էրեբունի թանգարանից ունեն եզրափակիչ երթ և ամփոփիչ հանրահավաք Երևանի քաղաքապետարանի դիմաց: