Խոսրովի անտառում հրդեհ է, վառվում են գիհիները. անհրաժեշտ է ցանկացած օգնություն
Վայրի բնության և մշակութային արժեքների պահպանման հիմնադրամը ֆեյսբուքյան էջում լուսնակարներ է հրապարակել Խոսրովի անտառի հրդեհից եւ նշել, որ անհրաժեշտ է ցանկացած օգնություն.
«Խոսրովի անտառում հրդեհ է: Վառվում են գիհիները: Մեր անտառապահները տեղում են՝ մարելու համար կրակը: Այս պահին անհրաժեշտ է ցանկացած օգնություն», ասված է հիմնադրամի գրառման մեջ:
Իսկ ԱԻՆ լրատվական ծառայությունը փոխանցում է, որ դեպքի վայր են մեկնել ԱԻՆ ՓԾ Արարատի մարզային փրկարարական վարչության օպերատիվ խումբը և հրշեջ-փրկարարական ջոկատներից հինգ մարտական հաշվարկ, փրկարարական ուժերի վարչության հատուկ նշանակության փրկարարական աշխատանքների իրականացման կենտրոնի փրկարարական երկու ջոկատ, հրդեհաշիջման և փրկարարական աշխատանքների կազմակերպման բաժնի օպերատիվ խումբը։
Տեղազննման աշխատանքների իրականացման նպատակով օդ է բարձրացվել անօդաչու թռչող սարք, դեպքի վայր է մեկնել նաև ուղղաթիռ։
Դեպքի վայրում են գտնվում ընդհանուր թվով 53 փրկարար ծառայող։
Կարծիքներ