Խորվաթիայի մի քանի շրջաններում աղետի ռեժիմ է հայտարարվել օրեր առաջ տեղի ունեցած երկրաշարժի հետևանքների պատճառով

Խորվաթիայի կառավարությունը դեկտեմբերի 29-ին տեղի ունեցած երկրաշարժի պատճառով երկրի մի շարք շրջաններում աղետի ռեժիմ է հայտարարել: ТАСС գործակալության փոխանցմամբ՝ այս մասին երկուշաբթի կառավարության նիստի ժամանակ հայտարարել է երկրի վարչապետ Անդրեյ Պլենկովիչը:

«Մենք այսօր որոշում ենք կայացրել ոչ միայն աղետի ռեժիմ հայտարարել մի շարք շրջաններում, այլև արդեն իսկ գոյություն ունեցող քաղաքացիական պաշտպանության շտաբի հիման վրա առանձին շտաբ ձևավորել վարչապետի և վետերանների հարցերով նախարար Տոմո Մեդվեդի գլխավորությամբ»,- ասել է Պլենկովիչը:  

Նրա խոսքով՝ նոր շտաբի կազմում կընդգրկվեն բոլոր նախարարությունների ներկայացուցիչները: Աղետի ռեժիմը ենթադրում է աշխատանքի համակարգված մոտեցում՝ տարերային աղետի հետևանքները հաղթահարելու համար:

Հիշեցնենք, որ դեկտեմբերի 29-ին Խորվաթիայում 6,3 մագնիտուդ ուժգնությամբ երկրաշարժ է տեղի ունեցել, որի էպիկենտրոնը գտնվել է մայրաքաղաք Զագրեբից 46 կմ հարավ-արևելք: Օջախը գտնվել է 5 կմ խորությամբ: Երկրաշարժի հետևանքով 7 մարդ մահացել է: