Շատ կարևոր է ստեղծել ռազմավարական և համագործակցային հարթակ. Հայկ Չոբանյանը՝ ՄԱԶԾ ներկայացուցիչներին
ՀՀ բարձր տեխնոլոգիական արդյունաբերության նախարար Հայկ Չոբանյանը ապրիլի 20-ին ընդունել է ՄԱԶԾ (ՄԱԿ-ի զարգացման ծրագիր) ներկայացուցիչներին։ Նախարարը ողջունել է նրանց և հույս հայտնել, որ քննարկման արդյունքում կուրվագծվեն հնարավոր համագործակցության եզրերը։
Հայկ Չոբանյանն իր խոսքում շեշտադրել է ռազմավարական երեք կարևոր ուղղություն, որոնք առանցքային դեր կարող են ունենալ ՄԱԶԾ-ի հետ համագործակցության շրջանակներում. կլիմայի փոփոխություն, նորարարություն և տեխնոլոգիաների ներդրում այլ ոլորտներում։
ՄԱԶԾ մշտական ներկայացուցչի պաշտոնակատար Միհաելա Ստոյկոսկայան ողջունել է նախարարին, շնորհավորել ՀՀ բարձր տեխնոլոգիական արդյունաբերության նախարար նշանակվելու կապակցությամբ և հույս հայտնել, որ համագործակցության հաջող փորձը շարունակական կլինի։
ՄԱԶԾ ներկայացուցիչներն ամփոփ խոսել են իրականացվող ծրագրերի մասին և շեշտադրել բոլոր այն ոլորտային ուղղությունները, որոնց շրջանակում կարող են նախանշվել համատեղ աշխատանքները։
Հայկ Չոբանյանը կարևորել է ՄԱԶԾ նախաձեռնությունները՝ մատնանշելով դրանց իրագործման կարևորությունը։
«Անհրաժեշտ է հստակեցնել նախարարության դերն իրականացվող ծրագրերում. ինչ դեր կարող է ունենալ ԲՏԱ նախարարությունը։ Ընդհանրապես, շատ կարևոր է ստեղծել ռազմավարական և համագործակցային հարթակ։ Միայն ուժերը միավորելով կարող ենք հաջողություն գրանցել ոլորտում, և այս գործընթացին պետք է մասնակցեն ոլորտի բոլոր ներկայացուցիչները»,- նշել է նախարարը։
Հանդիպման ավարտին Հայկ Չոբանյանը նախարարության համապատասխան բաժինների պատասխանատուներին հանձնարարել է ըստ ծրագրերի և ուղղությունների տասնօրյա ժամկետում կազմակերպել աշխատանքային հանդիպումներ, որպեսզի պայմանավորվածություններն ուղղորդվեն դեպի գործնական փուլ։
Կարծիքներ