Կասիլյասը դարպասապահների պատրաստման կենտրոն է բացել Դուբայում

Մադրիդի «Ռեալի» ու Իսպանիայի հավաքականի նախկին դարպասապահ Իկեր Կասիլյասը դարպասապահներ պատրաստելու իր առաջին կենտրոնն է բացել։ Այն կոչվում է «Իկեր Կասիլյասի դարպասապահների պատրաստման կենտրոն» ու գտնվում է Դուբայում։ Այս մասին գրում է Armsport.am-ը՝ վկայակոչելով AS-ը։

Նախագիծն արժանացել է Էմիրաթների սպորտային խորհրդի հավանությանը։

«Միշտ երազել եմ պարտքս այն սպորտին վերադարձնելու մասին, որն ինձ ամեն ինչ է տվել, դրա համար էլ կենտրոն բացեցի՝ նվիրված տաղանդավոր դարպասապահների զարգացմանը։ Չնայած նրան, որ կենտրոնը դարպասապահների կմարզի, մեր գլխավոր նպատակը երիտասարդ լավ ֆուտբոլիստների գտնելն ու նրանց զարգացնելն է»,-  Կասիլյասի խոսքերն է փոխանցում AS-ը։

Կենտրոնում կարող են մարզվել նաև պրոֆեսիոնալ դարպասապահներ՝ ներառյալ արտասահմանից։ Նաև պլանավորվում է դարպասապահների մարզիչների ուսուցում։

Կասիլյասի նախագիծը կաշխատի «Ֆուրսան Խիսպանիա» ֆուտբոլային ակումբի հետ համագործակցությամբ, որի հիմնադիրը Մադրիդի «Ռեալի» նախկին պաշտպան Միչել Սալգադոն է։