ԱՄՆ-ում ոստիկանությունը կրկին խեղդամահ է արել մի մարդու՝ ծնկով սեղմելով նրա պարանոցը

Կալիֆոռնիայում մարդը մահացել է այն բանից հետո, երբ ոստիկանության աշխատակիցը ծնկով սեղմած է պահել նրա պարանոցը: Այդ մասին հաղորդում է Los Angeles Times-ը։ Դեպքը տեղի է ունեցել դեկտեմբերի 23-ին, Կալիֆոռնիա նահանգի Անտիոք քաղաքում, սակայն լրատվամիջոցներն  այդ մասին իմացել են միայն հիմա:

30-ամյա Անջելո Կինտոյի ընտանիքը ոստիկանություն է զանգահարել, երբ տղամարդը պարանոյիկ վիճակում է եղել: Ոստիկանության ժամանելուն պես Կինտոն արդեն հանգստացած է եղել մոր գրկում: Այնուամենայնիվ, ոստիկաններից մեկը նրան պառկեցրել է հատակին և հինգ րոպե ծնկով սեղմել պարանոցը։ Երբ Կինտոն շրջվել է մեջքի վրա, նրա դեմքը արյան մեջ է եղել: Տղամարդը մահացել է երեք օր անց հիվանդանոցում ՝ գիտակցության չգալով: Կինտոյի ընտանիքը նախորդ շաբաթ դատական ​​հայց է ներկայացրել ոստիկանության սպաների դեմ սպանության համար:

Նշվում է, որ Կինտոն ծնվել է Ֆիլիպիններում, ծառայել է Միացյալ Նահանգների ռազմածովային ուժերում, իսկ պահեստազոր է ուղարկվել 2019 թվականին: Իր կյանքի մեծ մասում նա տառապել է դեպրեսիայից: Նրա վիճակը կտրուկ վատացել է, երբ անհայտ անձինք 2020 թվականին հարձակվել են նրա վրա: Հետո նա լուրջ վնասվածքներով արթնացել է հիվանդանոցում, բայց չի հիշել, թե ինչ է պատահել իր հետ: Հետո նրա մոտ զարգացել է պարանոյա և խուճապի նոպաներ: