Բավրայի հատվածում հաճախակի գրանցվող ստորգետնյա ցնցումները իրենցից մեծ վտանգ չեն ներկայացնում. երկրաբան
ՀՀ ԱԻՆ սեյսմիկ պաշտպանության ծառայության սեյսմիկ վտանգների գնահատման վարչության պետի տեղակալ, երկրաբանական գիտությունների թեկնածու Հրաչյա Պետրոսյանն անդրադարձել է հայ-վրացական սահմանին՝ Բավրայի հատվածում վերջին շրջանում հաճախակի գրանցվող ստորգետնյա ցնցումներին: Երկրաբանն ընդգծեց, որ այդ ցնցումները իրենցից մեծ վտանգ չեն կարող ներկայացնել, ինչը չի նշանակում, որ համապատասխան ծառայությունները կարող են թուլացնել զգոնությունը: Տվյալ երկրաբանական խզվածքը ընդգրկում է Հայաստանի և Վրաստանի տարածքը և զգացվում է հիմնականում Ջավախքի տարածաշրջանում:
Ինչ վերաբերվում է 33 տարի առաջ տեղի ունեցած Սպիտակի երկրաշարժին, ըստ գիտնականի, այն հետևանք էր Փամբակի խզվածքի մինչև 7 մագնիտուդ գերակտիվացմանը Վանաձոր- Սպիտակ- Գյումրի ուղղությամբ: Հ. Պետրոսյանը հարկ է համարում հատուկ ընդգծել, որ այն ունեցել է բնական, բայց ոչ երբևէ արհեստական ծագում, և բոլոր նման խոսակցությունները ավելին չեն, քան դավադրության տեսություն: «Հայաստանի ներկայիս տարածքում սեյսմիկ ակտիվություն դրսևորող 16 երկրաբանական խզվածք կա: Հարկավոր է սովորել երկրաշարժի հետ ապրել, քանի որ ժամանակակից գիտությունն այս հարցում առայժմ անզոր է»,- նշեց Պետրոսյանը:
Երկրաշարժերի ժամկետները և հզորությունը կարելի է կանխատեսել այս կամ այն մոտավոր ճշգրտությամբ: Գիտնականը բոլորին խորհուրդ է տալիս այս հարցում չլինել լավատես կամ հոռետես, այլ՝ լինել իրատես:
Կարծիքներ