Կանադայում ցուցարարները փակել են ԱՄՆ տանող կամուրջը

Կանադայում շարունակվում են բեռնատարների վարորդների ցույցերը կորոնավիրուսային սահմանափակումների դեմ։ Ցուցարարներն արգելափակել են «Ամբասադոր» կամուրջը, որը կապում է ամերիկյան Դեթրոյթ և կանադական Վինձոր քաղաքները, հաղորդում է The Guardian պարբերականը։ Այդ կամրջով օրական 8000 բեռնատար է անցնում՝ ապահովելով երկու երկրների միջև առևտրի 27 տոկոսը։

Բողոքի ակցիաներ են տեղի ունենում նաև ԱՄՆ-ի հետ սահմանակից Քութս քաղաքում։

Մայրաքաղաք Օտտավայում էլ հարյուրավոր բեռնատարներ շարունակում են կայանված մնալ՝ փակելով կենտրոնական փողոցները։ Ոստիկանությունը 23 մարդու է ձերբակալել։

Ըստ պարբերականի՝ Կանադայում պատվաստված չէ բեռնատարների վարորդների 15 տոկոսը։ Երկրում մեծապես աջակցում են հանրային առողջության պահպանման համար ձեռնարկվող միջոցառումներին։ «Ազատության շարասյուն» անվանումը ստացած ակցիան մեծ աջակցություն է ստացել հակակառավարական խմբերից։

Օտտավայի բնակիչներից շատերը դեմ են ցույցին, որն ուղեկցվում է ազդանշանների աղմուկով, հրավառություններով և անկարգություններով։ Ոստիկանությունը նաև հայտնել է, որ քաղաքի կենտրոնում գտնվող 418 բեռնատարների մի մասում երեխաներ կան։ Իրավապահներն անհանգստացած են նրանց վիճակի համար՝ ցրտի, աղմուկի, ածխածնի օքսիդի վտանգի և սանիտարական պայմանների պատճառով։