Ներքին Գետաշենի թիվ 2 միջնակարգ դպրոցի սանը Մենթալ թվաբանության միջազգային մրցաշարում գրավել է երկրորդ տեղը

Գեղարքունիքի մարզի Մարտունի համայնքի Ներքին Գետաշեն գյուղի Ա․ Եղիազարյանի անվան թիվ 2 միջնակարգ դպրոցի 7-րդ դասարանի աշակերտուհի Արինա Աբելյանը  Արաբական Միացյալ Էմիրությունների Դուբայ քաղաքում կայացած Մենթալ թվաբանության միջազգային օլիմպիադայում զբաղեցրել է 2-րդ մրցանակային տեղը։

Ինչպես «Արմենպրես»-ին տեղեկացրեց Ներքին Գետաշենի թիվ 2 միջնակարգ դպրոցի տնօրեն Արմինե Ղումաշյանը, վերջին չորս տարիների ընթացքում սա Արինայի յոթերորդ նվաճումն է Մենթալ թվաբանության օլիմպիադայում, որտեղ նա արժանացել է սուպերգավաթի, սուպերչեմպիոնության, 1-ին տեղի մի քանի դիպլոմների։

«Մեր  դպրոցում բոլորս սրտի թրթիռով սպասում էինք մեր խելացի աշակերտուհուն` Արինա Աբելյանին,  որը հաղթանակի վեհ զգացում էր պարգևել բոլորիս։

Առավել հուզումնալից եղավ և այն, որ Արինան Դուբայում տեղի ունեցած Մենթալ թվաբանության օլիմպիադայում տարած իր հաղթանակը նվիրեց  Արցախյան 44-օրյա պատերազմում նահատակված Ներքին Գետաշեն գյուղի հերոսների և դպրոցի հիմնադիր-տնօրեն Աղվան Եղիազարյանի հիշատակին։ Մենք հպարտ ենք մեր շնորհալի աշակերտի հաջողություններով ու հավատացած, որ նա շատ շուտով կքայլի գիտության նորահայտ բարձունքներով»,-նշեց դպրոցի տնօրենը։