ԵՄ-ում առաջին անգամ հավանություն են տվել հակակորոնավիրուսային դեղամիջոցի

Դեղամիջոցների հարցերով եվրոպական գործակալությունը (EMA) հաստատել է կորոնավիրուսի դեմ ամերիկյան դեղագործական հսկա MSD-ի մոլնուպիրավիր դեղամիջոցի օգտագործման արտակարգ թույլտվությունը։ Այս մասին հայտնում է գործակալության մամուլի ծառայությունը։

Lagevrio (մոլնուպիրավիր կամ MK 4482) դեղամիջոցը, որը ներկայում գրանցված չէ ԵՄ-ում, կարելի է օգտագործել մեծահասակների բուժման համար, ովքեր հավելյալ թթվածնի կարիք չունեն և առկա է կորոնավիրուսային հիվանդության ծանր ձևի զարգացման բարձր ռիսկ։ Պատիճների տեսքով դեղորայքը պետք է ընդունել 5 օր՝ օրական 2 անգամ։

Ինչպես նշում է արտադրողը, դեղամիջոցը նվազեցնում է կորոնավիրուսի՝ օրգանիզմի բջիջներում բազմանալու ունակությունն ու դանդաղեցնում քովիդի զարգացումը։

Բացի այդ, EMA-ն սկսել է ամերիկյան դեղագործական Pfizer ընկերության հակակորոնավիրուսային Paxlovid հաբերի ստուգման ընթացակարգ։ Դեղամիջոցը նվազեցնում է հոսպիտալացման կամ մահվան հավանականությունը 89 տոկոսով։