Բժիշկները դրական դինամիկա են նկատել ընդդիմադիր Ալեքսեյ Նավալնիի մոտ

Օմսկի մարզային հիվանդանոցի բժիշկները դրական դինամիկա են նկատել ընդդիմադիր Ալեքսեյ Նավալնիի մոտ։ Այս մասին հայտնել է հաստատության գլխավոր բժիշկ Ալեքսանդր Մուրախովսկին, փոխանցում է «Газета.ру» - ն։

«Երեք տարբեր լաբորատորիաներում անցկացված կենսանյութերի բոլոր անալիզները թունավորման նշաններ չեն հայտնաբերել։ Արյան եւ մեզի անալիզներում նույնպես չեն հայտնաբերվել «2-էթիլգեքսիլ դիֆենիլ ֆոսֆատ» արդյունաբերական քիմիական բաղադրության հետքերն իսկ, որոնց մասնիկները հայտնաբերվել են ձեռքերի վրա, այսինքն՝ այդ նյութով թունավորումը նույնպես բացառված է», — հայտարարել է նա։

Բժիշկը նաեւ բացատրել է, որ գերմանացի բժիշկները գնահատել են հիվանդի վիճակը եւ համաձայնել, որ Նավալնու տեղափոխման հրատապ անհրաժեշտություն չկա: Բացի այդ, ավիաթռիչքը կարող է բլոգերի վիճակի վատթարացման վտանգ ներկայացնել։ «Սակայն նրա վիճակի որոշ բարելավման ֆոնին այդ ռիսկը փոքր — ինչ նվազում է», - հավելել է Մուրախովսկին:

Ավելի վաղ շտապ բժշկական օգնության թիվ 1 քաղաքային հիվանդանոցի գլխավոր բժշկի տեղակալ Անատոլի Կալինիչենկոն հայտարարել էր, որ Նավալնիի վիճակը կայունացել է, եւ նրան կարելի է Գերմանիա ուղարկել բուժման: Նրա խոսքերով՝ էլեկտրաէնցեֆալոգրաֆիայի անցկացումից հետո պարզվել է, որ հիվանդի ուղեղը կայուն վիճակում է։