Բայդենը Սի Ցզինպինի հետ առցանց գագաթնաժողովում անձնական հանդիպման հույս է հայտնել
ԱՄՆ նախագահ Ջո Բայդենը Չինաստանի նախագահ Սի Ցզինպինի հետ առցանց հանդիպման ժամանակ նշել է առանցքային ոլորտներում միջազգային համագործակցության կարևորությունը։ Այս մասին հայտնել է ՏԱՍՍ-ը՝ հղում անելով Սպիտակ տան մամուլի ծառայությանը։
Ըստ Բայդենի՝ նման մոտեցումը կլինի համաշխարհային պատասխանատու առաջնորդության օրինակ։ Ամերիկացի առաջնորդը հայտարարել է, որ ԱՄՆ-ի և Չինաստանի հարաբերությունները զգալի ազդեցություն ունեն մնացած աշխարհի վրա:
Ինչպես նշել է ԱՄՆ նախագահը՝ բոլոր երկրները պետք է խաղան նույն կանոններով։ Նա ընդգծել է, որ Միացյալ Նահանգները միշտ կպաշտպանի իր շահերն ու արժեքները, ինչպես նաև իր դաշնակիցներին ու գործընկերներին։
«ԱՄՆ-ի և Չինաստանի իշխանությունները պետք է ամեն ինչ անեն, որպեսզի պետությունների միջև մրցակցությունը չհանգեցնի հակամարտության։
Որպես Չինաստանի և Միացյալ Նահանգների ղեկավարներ մեր պարտականությունն է ապահովել, որ մեր երկրների միջև մրցակցությունը չվերածվի կոնֆլիկտի, միտումնավոր կամ ոչ միտումնավոր: Միայն պարզ, ուղղակի մրցակցություն», - ասել է նախագահը:
Բայդենը նաեւ նշել է, որ հույս ունի Սի Ցզինպինի հետ անձնական հանդիպման։
Կարծիքներ