Կոտայքում ճանապարհի մերկասառույցի պատճառով վրաերթի են ենթարկվել ծառայություն կատարող պարեկները

Այսօր՝ փետրվարի 5-ին, ճանապարհի մերկասառույցի պատճառով վրաերթի են ենթարկվել ծառայություն կատարող պարեկները։

Այս մասին հայտնում է shamshyan.com-ը՝ նշելով, որ ժամը 12։00-ի սահմանում Գեղարքունիքի մարզի բնակիչ 35-ամյա Վահե Ս-ն իր վարած Opel Astra մակնիշի ավտոմեքենայով Երևան-Սևան ավտոճանապարհի՝ Չայնիի ոլորանների սկզբնամասում ճանապարհի մերկասառույցի պաճառով չի կարողացել կառավարել ավտոմեքենան և վրաերթի է ենթարկել նշված հատվածում ծառայություն կատարող ՀՀ ՆԳՆ Պարեկային ծառայության Կոտայքի գումարտակի ավագ պարեկ Արթուր Գրիգորյանին և կրտսեր պարեկ Յուրիկ Խաչատրյանին։

Վարորդը փախուստի չի դիմել, օգնել է ժամանած «Աբովյան» ԲԿ-ի բժիշկներին, որպեսզի վրաերթի ենթարկվածներին տեղափոխեն «Աբովյան» ԲԿ։

Տեղում վրաերթի ենթարկված պարեկների աշխատանքը շարունակել են նույն վաշտի այլ պարեկներ, քանի որ վաղ առավոտվանից նշված հատվածում ճանապարհի մերկասառույցը մի իսկական պատուհաս է դարձել վարորդների համար։

Ըստ կայքի՝ ճանապարհը սպասարկող ճանշինականները ոչ մի աշխատանք չեն կատարել ճանապարհի մերկասառույցը վերացնելու, ճանապարհը աղ ու ավազով մշակելու ուղղությամբ։

Վրաերթի փաստով քննչական բաժնում նախաձեռնվել է վարույթ։

Opel-ի վարորդը ենթարկվել է սթափության փորձաքննության. նա եղել է սթափ։