«Ես պետք է ճոխ անեմ, դու՝ մի քիչ անես, հո դու իմ պես չես կարող, ամեն մարդ իր հնարավորությունների սահմանում». Գագիկ Ծառուկյանը՝ որդու հարսանիքի մասին

Ասեկոսեներ են, ավելորդ խոսակցություններ են, լուրջ մի ընդունեք։ Այս մասին լրագրողների հետ զրույցում ասաց «Բարգավաճ Հայաստան» կուսակցության առաջնորդ Գագիկ Ծառուկյանը՝ անդրադառնալով լուրերին առ այն, հնարավոր է կոալիցիա կազմեն իշխող կուսակցության հետ։

Անդրադառնալով իր որդու հարսանեկան արարողության վերաբերյալ քննարկումներին՝ Գագիկ Ծառուկյանն ասաց․ «Ծառուկյանը պատրաստ է ցանկացածի պատասխանը տալ՝ անկախ ամեն ինչից»,- ասաց նա և հավելեց. «Ես մինչ այսօր չեմ ասել, բայց ուզում եմ ասել. երբ պատերազմը սկսեց, Ծառուկյանը բերդում էր, ես 3 միլիոն դոլար ուղարկել եմ Արցախ մեր բանակին՝ մեր հզորության համար, այդ մասին լուրեր տարածողները կամ դրանց տերերը չեն խոսում»,–ասաց նա և նշեց, որ գիտի, թե ովքեր են այդ տերերը և որ նրանք հարսանիքի էլ են մասնակցում։

Ինչ վերաբերում է հարսանիքի ճոխությանը, Ծառուկյանն ասաց․«Դա ես պետք է ճոխ անեմ, դու՝ մի քիչ անես, հո դու իմ պես չես կարող, ամեն մարդ իր հնարավորությունների սահմանում»։ Նա նշեց, որ երեխաներն են որոշել իրենց հարսանիքը կազմակերպել: Ըստ նրա՝ իր որդու հարսանիքի մասին լուրեր տարածողները ուզում են դիվիդենտեր շահել։

Անդրադառնալով սպասվող արտահերթ ընտրություններին՝ նա նախ ասաց, որ պետք է պայքարեն ժողովրդին սևերի ու սպիտակների բաժանման դեմ, սաստեն, որ նման բաներ թույլ չտան։ «Ազգը մեկն է, ժողովուրդը մեկն է, չի կարելի սևերի ու սպիտակների բաժանել»,–ասաց նա և հավելեց, որ գնում է հաղթելու:

Գագիկ Ծառուկյանը կարևորեց Հայոց Ցեղասպանության ճանաչման հարցը և նշեց, որ Թուրքիան մեր թշնամին է։