Օտտավան պնդում է, որ Կարակասում պայմաններ չկան ժողովրդավարական ընտրություններ անցկացնելու համար

Վենեսուելայում դեռևս բացակայում են ազատ և արդար ընտրությունների անցկացման պայմանները։ Այսպիսի հայտարարություն է արել Կանադայի ԱԳՆ ղեկավար Մելանի Ջոլին երեքշաբթի օրը տարածած իր հայտարարության մեջ։

«Նոյեմբերի 21-ին Վենեսուելայում տեղի ունեցան տարածաշրջանային և մունիցիպալ ընտրություններ: Ինչպես 2018 թվականին, Վենեսուելան դեռևս չունի պայմաններ ազատ և արդար ընտրություններ անցկացնելու համար: Նախագահ Նիկոլաս Մադուրոյի ռեժիմը շարունակում է բանտարկել և հետապնդել քաղաքական հակառակորդներին և պոտենցիալ հակառակորդներին», - ասել է Կանադայի արտգործնախարարը: Նա հավելել է, որ Օտտավան շարունակում է աջակցել Վենեսուելայի ընդդիմությանը և կոչ է անում Մադուրոյին հարգել երկրի սահմանադրությունը, որպեսզի քաղաքացիները կարողանան անցկացնել ժողովրդավարական ընտրություններ։

Կիրակի օրը Վենեսուելայում տեղի են ունեցել տարածաշրջանային և մունիցիպալ ընտրություններ, որոնց ընթացքում երկրի քաղաքացիները որոշել են տեղական գործադիր իշխանության ապագա ղեկավարներին և օրենսդիր մարմնի անդամներին։ Ազգային ընտրական խորհրդի տվյալներով՝ իշխող կոալիցիան նահանգների պաշտոններ է ստացել 23 նահանգներից առնվազն 18-ում, իսկ երկուում՝ ընդդիմադիր «Ժողովրդավարական միասնություն» դաշինքը:

Վենեսուելայի կառավարությունն ու ընդդիմությունը Նորվեգիայի միջնորդությամբ օգոստոսի 13-ին սկսել են բանակցությունները Մեքսիկայում։ Առաջին փուլի ընթացքում կողմերը ստորագրել են փոխըմբռնման հուշագիր՝ հաստատելով երկխոսության իրենց պատրաստակամությունը։ Այս հանդիպումներից հետո ընդդիմադիր կուսակցությունների կոալիցիան հայտարարեց, որ մասնակցելու է տարածաշրջանային ընտրություններին։