Վաշինգտոնում բախումներ են տեղի ունեցել Թրամփի աջակիցների եւ ոստիկանության միջեւ. կան ձերբակալվածներ

Վաշինգտոնում բախումներ են տեղի ունեցել ԱՄՆ նախագահ Դոնալդ Թրամփի աջակիցների եւ ոստիկանության միջեւ: Թրամփի աջակիցները մտադիր էին բողոքի ակցիա անցկացնել Կոնգրեսում նախագահական ընտրությունների արդյունքների կայանալիք սերտիֆիկացման դեմ, գրում է Fox News-ը:

Երեքշաբթի երեկոյան ոստիկանությունն արդեն 6 մարդու է ձերբակալել տարբեր խախտումների համար՝ զենքի կրումից մինչեւ ոստիկանների վրա հարձակումներ՝ հայտնել են քաղաքային իշխանությունները:

Նշվում է, որ բողոքի ակցիաների մասնակիցներից շատերը հավաքվել են Freedom Plaza շենքի մոտ, որը տեղակայված է Սպիտակ տնից դեպի արեւելք:

Թրամփի հարյուրավոր աջակիցներ նույնիսկ գիշերել են շենքի առջեւ՝ չնայած ցրտին եւ անձրեւին:

Նշվում է, որ Դոնալդ Թրամփն արձագանքել է իր աջակիցների գործողություններին՝ նրանց աջակցություն հայտնելով Twitter-ի իր միկրոբլոգում: