Միգուցե առաջիկայում գնանք խաղային ոլորտի ընկերությունները փակելու ճանապարհով. ՔՊ պատգամավոր
Հայաստանի ազգային ժողովի «Քաղաքացիական պայմանագիր» խմբակցության պատգամավոր Հայկ Սարգսյանը չի բացառում խաղային ոլորտի կազմակերպությունները փակելու հնարավորությունը:
«Արմենպրես»-ի փոխանցմամբ՝ Սարգսյանն այս մասին ասաց ԱԺ տնտեսական հարցերի հանձնաժողովի նիստում իր ներկայացրած նախագծի քննարկմանը, որով պատգամավորն առաջարկում է շահումով խաղերի, ինտերնետ շահումով խաղերի, վիճակախաղերի, տոտալիզատորի և ինտերնետ տոտալիզատորի կազմակերպման գործունեության հարկային բեռը բարձրացնել՝ սահմանելով 10 տոկոս շրջանառության հարկ:
«Միգուցե նաև քննարկենք և առաջիկայում գնանք ընկերությունները փակելու ճանապարհով, որի փորձը նույնպես աշխարհում կա»,-ասաց պատգամավորը:
Հայկ Սարգսյանը կառավարությանը սկզբում 3 տարբերակ է առաջարկել, վերջում ներկայացրել է 3-րդ տարբերակը:
«Առաջին տարբերակ՝ օրենքով արգելել բոլոր տեսակի շահումով խաղերը, մոլախաղերը և բուքմեյքերական գործունեությունը՝ ինչպես օրինակ ԱՄԷ-ում, Կատարում, Իրանում, ԱՄՆ որոշ նահանգներում: Գործունեության արգելքը կբերի նրան, որ այս ուղղությամբ մեր քաղաքացիների կողմից ծախսվող գումարները կուղղվեն տնտեսության այլ ճյուղեր»,-ասաց Սարգսյանը:
Ըստ նրա՝ արդյունքում կշահեն և մոլախաղերով տարված քաղաքացիները, նրանց ընտանիքի անդամները, և տնտեսության այլ ճյուղերը, որտեղ առավել մեծ թվով գումարներ կներգրավվեն:
«Երկրորդ տարբերակը՝ աշխարհում կա նման փորձ, որ նման գործունեությամբ զբաղվող ընկերությունները բացառապես պետական ընկերություններն են: Այդ երկրներն են Սինգապուրը, Չինաստանը, Թուրքիան, Ադրբեջանը, Շվեդիան»,-ասաց Սարգսյանը:
Ըստ պատգամավորի՝ ընկերությունների համար ամենաթույլ տարբերակն է եղել 10 տոկոս շրջանառության հարկ սահմանելը: Հակված են երրորդ տարբերակով առաջ շարժվելուն: «Առայժմ գնում ենք երրորդ տարբերակով»,-նշեց նա:
Կարծիքներ