Թրամփն առաջարկել է Զելենսկիին պատերազմը դադարեցնելու դիմաց հրաժարվել Ղրիմից և ՆԱՏՕ-ի անդամակցությունից
Միացյալ Նահանգների նախագահ Դոնալդ Թրամփը հայտարարել է, թե ինչպես կարող է Ուկրաինայի նախագահ Վոլոդիմիր Զելենսկին վերջ տալ իր երկրում շարունակվող պատերազմին։
«Արմենպրես»-ի փոխանցմամբ, Truth Social-ում ԱՄՆ նախագահը գրել է․ «Ուկրաինայի նախագահ Զելենսկին կարող է գրեթե անմիջապես դադարեցնել պատերազմը Ռուսաստանի հետ, եթե ցանկանա, կամ կարող է շարունակել կռվել։ Հիշեք, թե ինչպես ամեն բան սկսվեց։ Ոչ մի վերադարձ Օբամայի հանձնած Ղրիմ (12 տարի առաջ՝ առանց որևէ կրակոցի) և Ուկրաինան չի միանա ՆԱՏՕ-ին։ Որոշ բաներ երբեք չեն փոխվում»։
Թրամփն առանձին գրառմամբ նշել է նաև, որ օգոստոսի 18-ը, երբ նա Վաշինգտոնում ընդունել է Ուկրաինայի նախագահին և եվրոպական երկրների ղեկավարներին, կարևոր օր է լինելու։ «Վաղը մեծ օր է լինելու Սպիտակ տանը։ Երբեք այսքան շատ եվրոպացի առաջնորդներ միաժամանակ չեն եղել [Սպիտակ տանը]։ Ինձ համար մեծ պատիվ է հյուրընկալել նրանց»,- գրել է Թրամփը։
Ավելի վաղ հայտնի էր դարձել, որ օգոստոսի 18-ին Զելենսկին Թրամփի հետ կհանդիպի Վաշինգտոնում։ Հանդիպմանը մասնակցելու են Ֆրանսիայի նախագահ Էմանուել Մակրոնը, Մեծ Բրիտանիայի վարչապետ Կիր Ստարմերը, Գերմանիայի կանցլեր Ֆրիդրիխ Մերցը և Իտալիայի վարչապետ Ջորջիա Մելոնին։ Հանդիպմանը մասնակցելու մասին հայտարարել է նաև Եվրահանձնաժողովի նախագահ Ուրսուլա ֆոն դեր Լայենը։
Կարծիքներ