Թուրքիայի հանգստավայրերից մեկում ռուս զբոսաշրջիկները զանգվածաբար վարակվել են անհայտ վիրուսով

Թուրքիայի Բելեք առողջարանային քաղաքի ափին անհայտ վիրուսի զանգվածային բռնկում է տեղի ունեցել։ Այս մասին հայտնում է SHOT Telegram ալիքը։

Ըստ լրագրողների՝ վերջին օրերին մոտակա հյուրանոցներից մի քանի տասնյակ երեխաներ և մեծահասակներ դիմել են տեղի հիվանդանոց՝ 39 աստիճանից բարձր ջերմությամբ, որը գրեթե հնարավոր չի եղել իջեցնել դեղամիջոցներով։

Ինչպես SHOT-ին հայտնել աղբյուրը, հիվանդության սուր փուլը տևում է մոտավորապես 4-5 օր՝ այդ ընթացքում հիվանդների վիճակը վատանում է, իսկ հետո ախտանշաններն աստիճանաբար թուլանում են։

Վարկածներից մեկի համաձայն՝ հիվանդության պատճառը կոքսակի վիրուսն է։ Դրա մասին է վկայում որոշ վարակված երեխաների ոտքերի և ձեռքերի վրա ցանի հայտնվելը։ Մեկ այլ վարկածի համաձայն՝ խոսքը նոր տեսակի կորոնավիրուսի մասին է, քանի որ որոշ մեծահասակների մոտ նկատվում են ոսկրային ուժեղ ցավեր, ախորժակի կորուստ և ստամոքսի խանգարում։ Հիվանդները նկարագրում են իրենց ախտանշանները, որոնք նման են այն զգացողություններին, որոնք ունեցել են կորոնավիրուսով վարակվելիս։

Ըստ SHOT-ի՝ գրեթե բոլոր հիվանդների մոտ ախտորոշվել է չճշտված սուր վարակ։ Վարակվածներին նշանակվել են հակաբիոտիկներ և հակավիրուսային դեղամիջոցներ։

Ինչպես հաղորդում է РИА Новости-ն՝ Անթալիայի նահանգի քաղաքապետարանին հղումով, վարակվածների թվում ռուսներ չկան։ Բելեքի իշխանությունները ասել են, որ իրենք ռուսներից որևէ բողոք չեն ստացել վիրուսի վերաբերյալ: Անթալիայի քաղաքապետարանը խոստացել է այդ կապակցությամբ հարցումներ ուղարկել հյուրանոցներին։