Ալիևներն ու Էրդողանները ցուցում են իջեցրել ռուսական էլիտայի իրենց գործակալներին. Ղազինյան
Հայաստանի կողմից Միջազգային քրեական դատարանի կանոնադրությունը (Հռոմի ստատուտ) վավերացնելը մեծ աղմուկ առաջացրեց Ռուսաստանում և որոշ խմբերի կողմից դա գնահատվեց որպես հակառուսական ակցիա:
Որպես իրենց գնահատականների հիմնավորում բերվում էր Միջազգային քրեական դատարանի կողմից ՌԴ նախագահ Պուտինին կալանավորելու որոշումը:
Ինձ համար գոնե անվիճելի և բացարձակ է, որ Ստատուտը վավերացնելու Հայաստանի որոշումը ոչ մի կապ չունի Պուտինին կալանավորելու Հայաստանի իշխանության ցանկության հետ, քանի որ եթե Պուտինը որոշի գա Հայաստան, ապա հենց այս իշխանությունը կարմիր գորգերը կփռի, պատվո պահակախումբը կշարի և խոնարհ հարսի դեմքով մեծից փոքր կգնան օդանավակայան նրան դիմավորելու: Վստահ եմ սա շատ լավ հասկանում և գիտակցում են նաև Ռուսաստանի խորքային պետության ներկայացուցիչները:
Այդ դեպքում ինչի՞ համար են աղմկում և բողոքում Ռուսաստանի որոշ շրջանակներ, տարատեսակ լավրովներն, պեսկովները, մարկովները:
Իմ համեստ կարծիքով նրանք, լինելով ռուսական էլիտայում թուրքական շահերի դեսպաններ և ներկայացուցիչներ, իրականում անհանգստանում են ալիևների և էրդողանների հետագա ճակատագրի համար, քանի որ շատ լավ գիտեն, թե ինչ մեթոդներով ու գործիքներով են թուրք-ադրբեջանական դաշինքը հասել Հայերի նկատմամբ «հաղթանակի». միջազգային ահաբեկիչներ, մարդկայինության դեմ ուղղված ամենածար հանցանքներ, էթնիկ զտումներլ ռասայական խտրականություն, էթնոցիդ:
Նույնիսկ ամենամակերեսային հետաքննության արդյունքում նշված բոլոր հանցանքները կստանան փաստական տվյալների ու ապացույցների մեծ բազա, ինչը խիստ անհանգստացնում է ալիևներին ու էրդողաններին, և նրանք ցուցում են իջեցրել Ռուսաստանի էլիտայում իրենց գործակալներին Ստատուտի վավերացումը ներկայացնել որպես հակառուսական ակցիա` դրանով իսկ Հայաստանի դեմ հանել Ռուսաստանի էլիտայի մնացած մասին ու բարեկամական ռուս ժողովրդին:
Հույս ունեմ, որ Ռուսաստանի խորքային պետության ներկայացուցիրները կհասկանան այս դավադրության վտանգավորության աստիճանը և գործուն միջոցներ կձեռնարկեն ռուսական շահերի դեմ այս խմբի գործունեությունը կասեցնելու ուղղությամբ:
Կարծիքներ