Մարությանը չեղարկել է սեպտեմբեր ամսվա բոլոր ներկայացումները
Երևանի նախկին քաղաքապետ, դերասան Հայկ Մարությանը տեղեկացրել է, որ չեղարկում է սեպտեմբեր ամսվա բոլոր ներկայացումները: Վերջինս այդ մասին գրառում է կատարել «Ֆեյսբուքի» իր էջում:
«Այս դժվար օրերին մենք, իհարկե, պետք է միջազգային հանրությանը ներկայացնենք Ադրբեջանի այլանդակ, բոլոր միջազգային նորմերը խախտող ագրեսիան Հայաստանի սուվերեն տարածքի նկատմամբ, իհարկե, պետք է ակտիվ աշխատենք մեր դաշնակիցների հետ խնդրի լուծման շուրջ, բայց ամենակարևորը՝ մենք պետք է քաջ գիտակցենք, որ մեր Հայրենիքը կարող ենք պաշտպանել միայն մենք ինքներս:
«Ոչ ոք մեր տեղը դա երբեք չի արել և չի էլ անելու: Ուստի պետք է դրվի մի նպատակ՝ Հայ առաքելական եկեղեցու օրհնությամբ կանգնել բանակի կողքին բոլոր հնարավոր և անհնարին միջոցներով:
Ցավակցում եմ զոհված զինծառայողների հարազատներին:
Հավերժ փառք մեր Տղաներին:
Աստված մեզ բոլորիս պահապան:
Հ.Գ. Բնականաբար, որոշում եմ կայացրել չեղարկել սեպտեմբերի բոլոր ներկայացումները: Լրացուցիչ տեղեկությունների համար խնդրում եմ կապվել tomsarkgh.am»,- գրել է նա:
Կարծիքներ