Ավստրիայի նոր արտգործնախարարը Կիևում հանդիպումներ է անցկացնում
Ավստրիայի արտաքին գործերի նախարարության նոր ղեկավար Բեատե Մայնլ Ռայզինգերը մարտի 14-ի առավոտյան պաշտոնական այցով ժամանել է Կիև։ Այս մասին Ռայզինգերը գրել է X սոցիալական հարթակի իր էջում։
«Շնորհակալ եմ իմ թանկագին գործընկեր Անդրեյ Սիբիհային այսօր Կիևում կայացած կարևոր առաջին անձնական հանդիպման համար: Ուկրաինան պայքարում է ոչ միայն իր ապագայի, այլև մեր եվրոպական արժեքների ու ազատությունների համար», – գրել է ավստրիացի նախարարը:
Սա Մայնլ Ռայզինգերի արդեն երկրորդ արտասահմանյան ուղևորությունն է մարտի 3-ին պաշտոնն ստանձնելուց հետո. առաջինը Բրյուսելն էր, որտեղ նա բանակցություններ է վարել ԵՄ դիվանագիտության ղեկավար Կայա Կալասի հետ:
Ըստ ավստրիական APA գործակալության՝ Մայնլ Ռայզինգերը Կիևում հանդիպումներ է նախատեսել նաև Ուկրաինայի վարչապետ Դենիս Շմիհալի և եվրոպական ու եվրաատլանտյան ինտեգրման հարցերով փոխվարչապետ և արդարադատության նախարար Օլհա Ստեֆանիշինայի հետ:
Կարծիքներ