Նարեկ Մալյանը դատապարտվել է ազատազրկման․ նա անազատության մեջ կմնա ևս 5 ամիս 7 օր

 Երևանի ընդհանուր իրավասության դատարանը հասարակական գործիչ Նարեկ Մալյանին դատապարտել է ազատազրկման՝ 1 տարի ժամկետով․ հաշվի առնելով Մալյանի՝ անազատության մեջ գտնվելու ժամանակը՝ նրա նկատմամբ վերջնական պատիժ է նշանակվել 5 ամիս 7 օր ժամկետով ազատազրկումը։

«Արմենպրես»-ի փոխանցմամբ՝ դատավճիռն ապրիլի 12-ին հրապարակել է դատավոր Սուսաննա Գզոյանը։

Նարեկ Մալյանից կբռնագանձվի վարութային գործողությունների՝ դատալեզվաբանական և դատահոգեբանական փորձաքննությունների գումարը՝ 108,000 ՀՀ դրամի և 190,000 ՀՀ դրամի չափով։

Նարեկ Մալյանին մեղադրանք էր առաջադրվել սոցիալական ցանցի իր էջի միջոցով ատելություն ու անհանդուրժողականություն քարոզելու հոդվածով։ Նա կալանքի տակ է 2023 թվականի սեպտեմբերից։