Nissan XTrail-ը բախվել է լիցքավորվող Nissan-ին, ապա վրաերթի ենթարկել բենզալցակայանի լիցքավորողին. կա զոհ. shamshyan.com

Այսօր՝ հունիսի 26-ին, ավտովթար և մահվան ելքով վրաերթ է տեղի ունեցել Երևանում։ Ժամը 14։25-ի սահմաններում Nissan XTrail մակնիշի ավտոմեքենան Աճառյան փողոցում բախվել է «Ֆլեշ» բենզալցակայանի տարածքում լիցքավորվող Nissan Teana մակնիշի ավտոմեքենային, այնուհետ վրաերթի է ենթարկել բենզալցակայանի լիցքավորողին։

Այս մասին գրում է shamshyan.com-ը:

Ըստ աղբյուրի, վթար-վրաերթի հետևանքով 2 հոգու շտապօգնության բժիշկների հերթապահ խումբը  նախ տեղում առաջին բուժօգնություն է ցուցաբերել, ապա տեղափոխել թիվ 1 համալսարանական հիվանդանոց։ Ճանապարհին վիրավորներից մեկը, գիտակցության չգալով, մահացել է։

Փաստի առթիվ հարուցվել է քրեական գործ՝ ՀՀ քր.օր-ի 242 հոդվածի 2-րդ մասի հատկանիշներով (Ճանապարհային երթևեկության անվտանգության ապահովմանն ուղղված պահանջները կամ տրանսպորտային միջոցների շահագործման կանոնները խախտելը)։