Թրևիս Սքոթի ելույթի ժամանակ տեղի ունեցած հրմշտոցի զոհերի թիվը հասել է 9-ի

Հյուսթոնում ռեփեր Թրևիս Սքոթի ելույթի ժամանակ տեղի ունեցած հրմշտոցի հետևանքով զոհերի թիվը հասել է 9-ի։ ՏԱՍՍ-ի փոխանցմամբ՝ այս մասին հաղորդել է Bloomberg-ը ՝ զոհվածի ընտանիքի փաստաբանին հղումով։

Նրա խոսքով՝ Տեխասի համալսարանի 22-ամյա ուսանողը մահացել է փառատոնում հրմշտոցի ժամանակ ստացած ծանր վնասվածքներից։ Ոստիկանությունից հայտնել են, որ ևս մեկ տուժած՝ ինը տարեկան տղան, գտնվում է հիվանդանոցում ծանր վիճակում:

Ավելի վաղ հայտնի էր դարձել ութ զոհի և տասնյակ վիրավորների մասին նոյեմբերի 5-ին Astroworld փառատոնի բացման ժամանակ տեղի ունեցած միջադեպի մասին։ Համերգի ժամանակ մարդիկ սկսեցին կուտակվել դեպի բեմի առջևը, ինչը խուճապի պատճառ դարձավ, և որոշ այցելուներ ուշաթափվեցին։

Ընդհանուր առմամբ միջոցառմանը եկել է մոտ 50 հազար մարդ։ Միջադեպի պատճառով համերգը դադարեցվել է, իսկ փառատոնը՝ չեղարկվել։