Պատերազմը փակուղուց դուրս գալու ելք չէ․ Աբդոլլահիան
Իրանի ԱԳ նախարար Հոսեյն Ամիր Աբդոլլահիանն այսօր Հունգարիայի իր գործընկեր Պետեր Սիարտոյի հետ համատեղ մամուլի ասուլիսում հայտարարել է, որ երկու կողմերի հարաբերությունները զարգանում են ճիշտ ուղղությամբ, և համատեղ տնտեսական հանձնաժողովի շրջանակներում ստորագրվել են երկու ռազմավարական փաստաթուղթ և գյուղատնտեսության ոլորտում համագործակցության ճանապարհային քարտեզ։
Իրանի ԱԳ նախարարն ընդգծել է, որ տարածաշրջանային և միջազգային հարցերի քննարկումը, ինչպես նաև Գազայի պատերազմը և Պաղեստինի ժողովրդի իրավունքների վերականգնումը եղել են այսօրվա բանակցությունների մյուս թեմաները։
«Մենք խստորեն դատապարտում ենք Իրանի դեմ անհիմն մեղադրանքները՝ կապված ռուս-ուկրաինական պատերազմի հետ, և այդ չհիմնավորված պնդումների անվերջ կրկնությունը հոգնեցուցիչ է դարձել»։
Նա հավելել է, որ ՄԱԿ-ի Գլխավոր ասամբլեայի վերջին բանաձևի համաձայն՝ նրանք (արևմտյան երկրները) Արդարադատության միջազգային դատարանից խորհրդատվական կարծիք են խնդրել Պաղեստինի ժողովրդի ինքնորոշման իրավունքի վերաբերյալ։
«Մենք պատերազմը չենք համարում ելք փակուղուց: Պատերազմը լուծում չէ ոչ Գազայում, ոչ էլ աշխարհի որևէ այլ վայրում: ԱՄՆ-ի և Մեծ Բրիտանիայի կողմից պատերազմը Եմեն տեղափոխելու փորձերը ռազմավարական սխալ են: Եմենի ժողովուրդն անտարբեր չէ իր ճակատագրի նկատմամբ և ունի անկախ դիրքորոշում: Մենք ընդգծում ենք, որ Միացյալ Նահանգները պետք է դադարեցնի կեղծավորությունը: Ամերիկյան իշխանությունների դիրքորոշումը, որը միևնույն ժամանակ աջակցում է Սիոնիստական ռեժիմի հանցագործություններին, խոսում է կեղծ խաղաղասիրության մասին»,- ասել է Իրանի արտգործնախարարը։
Կարծիքներ