«Սևան» ՔԿՀ-ում կանխվել է թմրամիջոցների փոխանցումը. ՔԿԾ

2021 թվականի դեկտեմբերի 13-ին՝ ժամը 19։55-ի սահմաններում, Հայաստանի Հանրապետության արդարադատության նախարարության «Սևան» քրեակատարողական հիմնարկի ծառայողը հայտնել է, որ 5-րդ և 6-րդ դիտաշտարակների  միջնամասից լսվում են կասկածելի ձայներ։

Այս մասին տեղեկանում ենք Արդարադատության նախարարության քրեակատարողական ծառայությունից։

Հիմնարկի ծառայողների կողմից անմիջապես իրականացվել են տեղզննման աշխատանքներ, որոնց արդյունքում խոտածածկ տարածքից հայտնաբերվել է սպիտակ, կասկածելի փաթեթ՝ առանձնացված երկու փաթեթներով։ Վերջիններում առկա են եղել 1․6, 21․2 և 2․4 գրամ քաշերով մարիխուանա տեսակի թմրամիջոցին նմանվող, դեղնականաչավուն բուսական զանգվածներ, որտեղ նկատվել են նաև կանեփանման հատիկներ։

Փաստի առթիվ նախապատրաստվում են նյութեր, հայտնաբերվածն ուղարկվել է դատաքիմիական փորձաքննության։